ସ୍ଲୋଭାକିଆରେ ମୋଦୀଙ୍କୁ ନିଆରା ସମ୍ବର୍ଦ୍ଧନା ‘ରୁଟି ଆଉ ଲୁଣ’ ଦେଇ ସ୍ୱାଗତ ନୂଆଦିଲ୍ଲୀ: ସ୍ଲୋଭାକିଆରେ ମୋଦୀଙ୍କୁ ନିଆରା ସମ୍ବର୍ଦ୍ଧନା କରାଯାଇଛି।

ସ୍ଲୋଭାକିଆ ରାଜଧାନୀ ବ୍ରାତିସ୍ଲାଭାରେ ପହଞ୍ଚିବା ପରେ, ‘ମୋଦୀ-ମୋଦୀ’ ଏବଂ ‘ଭାରତ ମାତା କି ଜୟ’ ଧ୍ୱନି ସହିତ ପ୍ରବାସୀ ଭାରତୀୟମାନେ ତାଙ୍କୁ ସ୍ୱାଗତ କରିଥିଲେ। ଏହି ଗସ୍ତ କେବଳ କୂଟନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ନୁହେଁ ବରଂ ଐତିହାସିକ ମଧ୍ୟ, କାରଣ ଏହା ୧୯୯୩ ମସିହାରେ ସ୍ଲୋଭାକିଆ ସ୍ୱାଧୀନତା ପରେ ଜଣେ ଭାରତୀୟ ପ୍ରଧାନମନ୍ତ୍ରୀଙ୍କ ଏହା ପ୍ରଥମ ସରକାରୀ ଗସ୍ତ। ବ୍ରାତିସ୍ଲାଭାରେ ପହଞ୍ଚିବା ପରେ ପ୍ରଧାନମନ୍ତ୍ରୀ ମୋଦୀଙ୍କୁ ଫୁଲ ତୋଡ଼ା ମାଳା ବଦଳରେ ‘ରୁଟି ଆଉ ଲୁଣ’ ଦେଇ ସ୍ୱାଗତ କରାଯାଇଥିଲା। ଏହା ସ୍ଲୋଭାକିଆ ସଂସ୍କୃତିର ଏକ ପ୍ରାଚୀନ ଏବଂ ସମ୍ମାନଜନକ ପରମ୍ପରା। ଏହି ପ୍ରଥା ସ୍ଲାଭିକ ପରମ୍ପରାରେ ଗଭୀର ଗୁରୁତ୍ୱ ବହନ କରିଥାଏ। ରୁଟିକୁ ଖାଦ୍ୟ ଏବଂ ସମୃଦ୍ଧିର ପ୍ରତୀକ ଭାବରେ ବିବେଚନା କରାଯାଏ, ଯେତେବେଳେ ଲୁଣ ମୂଲ୍ୟ, ସ୍ଥାୟୀ ବନ୍ଧୁତା ଏବଂ ସୁରକ୍ଷାର ପ୍ରତୀକ ଭାବେ ବିବଚେନା କରାଯାଇଥାଏ। ଏହି ପରମ୍ପରା ଅନୁସାରେ ସ୍ଲୋଭାକବାସୀମାନେ ସେମାନଙ୍କ ଅତିଥିମାନଙ୍କୁ ଉଷ୍ମତା ଏବଂ ସଦ୍ଭାବନା ସହିତ ସ୍ୱାଗତ କରିଥାନ୍ତି। ସ୍ୱାଗତ ସମାରୋହ କେବଳ କୂଟନୀତି ନୁହେଁ ବରଂ ସଂସ୍କୃତିର ଏକ ଉଲ୍ଲେଖନୀୟ ମିଶ୍ରଣ ମଧ୍ୟ ପ୍ରଦର୍ଶନ କରିଥିଲା। ଲୁଚନିକା ଏନସେମ୍ବଲ୍ ‘ବନ୍ଦେ ମାତରମ୍’ର ଏକ ମନମୋହକ ପରିବେଷଣ କରିଥିଲେ, ଯାହା ପରିବେଶକୁ ଦେଶପ୍ରେମର ଉତ୍ସାହରେ ପରିପୂର୍ଣ୍ଣ କରିଥିଲା। ଏହା ବ୍ୟତୀତ, ପ୍ରସିଦ୍ଧ ସ୍ଲୋଭାକିଆନ୍ ସଂଗୀତ ଗୋଷ୍ଠୀ, ‘ମହାଦେବ କୀର୍ତ୍ତନ ପ୍ରୋଜେକ୍ଟ’ ଏକ ଆଧ୍ୟାତ୍ମିକ ପ୍ରଦର୍ଶନ ଉପସ୍ଥାପନ କରିଥିଲା ଯାହା ପ୍ରଧାନମନ୍ତ୍ରୀଙ୍କୁ ମୁଗ୍ଧ କରିଥିଲା। ଏହି ଐତିହାସିକ ମୁହୂର୍ତ୍ତ ପାଇଁ ଭାରତୀୟ ସମ୍ପ୍ରଦାୟ ଅତ୍ୟନ୍ତ ଉତ୍ସାହିତ ଥିଲେ। ପ୍ରଧାନମନ୍ତ୍ରୀ ମୋଦୀ ତାଙ୍କ ଗସ୍ତ ସମୟରେ ସ୍ଲୋଭାକିଆ ପ୍ରଧାନମନ୍ତ୍ରୀ ରବର୍ଟ ଫିକୋ ଏବଂ ରାଷ୍ଟ୍ରପତି ପିଟର ପେଲେଗ୍ରୀନିଙ୍କୁ ଭେଟିବେ। ଏହି ଉଚ୍ଚସ୍ତରୀୟ ଆଲୋଚନାର ମୁଖ୍ୟ ଉଦ୍ଦେଶ୍ୟ ହେଉଛି ବାଣିଜ୍ୟ, ନିବେଶ, ପ୍ରତିରକ୍ଷା, ଅଟୋମୋବାଇଲ୍ ଏବଂ ରେଳ ନିର୍ମାଣ ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ରରେ ଦୁଇ ଦେଶ ମଧ୍ୟରେ ସହଯୋଗକୁ ପ୍ରୋତ୍ସାହିତ କରିବା। ସ୍ଲୋଭାକିଆ ଆସିବା ପୂର୍ବରୁ ପ୍ରଧାନମନ୍ତ୍ରୀ ଫ୍ରାନ୍ସ ଗସ୍ତ କରିଥିଲେ, ଯେଉଁଠାରେ ସେ ରାଷ୍ଟ୍ରପତି ଇମାନୁଏଲ ମାକ୍ରନଙ୍କୁ ଭେଟିଥିଲେ । ଭାରତ ଏବଂ ଫ୍ରାନ୍ସ ମଧ୍ୟରେ ପ୍ରତିରକ୍ଷା, ମହାକାଶ, ପରମାଣୁ ଶକ୍ତି ଏବଂ ଡିଜିଟାଲ ପ୍ରଯୁକ୍ତିବିଦ୍ୟା ସମେତ ୧୯ ରୁ ଅଧିକ ଗୁରୁତ୍ୱପୂର୍ଣ୍ଣ ଚୁକ୍ତି ସ୍ୱାକ୍ଷରିତ ହୋଇଥିଲା।