ହର୍ମୁଜ ପ୍ରଣାଳୀ ଖୋଲିବା ପ୍ରସଙ୍ଗ ଇରାନକୁ ସମର୍ଥନ କଲେ ଓମାନ ଉପରେ ହେବ ଆକ୍ରମଣ : ଟ୍ରମ୍ପ

ୱାସିଂଟନ, ୨୮|୫: ହର୍ମୁଜ ପ୍ରଣାଳୀ ଖୋଲିବା ପ୍ରସଙ୍ଗରେ ଇରାନକୁ ସମର୍ଥନ କଲେ ସ୍ଥିତି ଖରାପ ହେବ ବୋଲି କହି ଆମେରିକା ଓମାନକୁ ଧମକ ଦେଇଛି।   ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନର ସହଯୋଗୀ ରାଷ୍ଟ୍ର ଓମାନ ବିରୋଧରେ ସିଧାସଳଖ ସାମରିକ କାର୍ଯ୍ୟାନୁଷ୍ଠାନ ଧମକ ଦେଇ ସମସ୍ତଙ୍କୁ ଚକିତ କରିଦେଇଛନ୍ତି। ଟ୍ରମ୍ପ ସ୍ପଷ୍ଟ କରିଛନ୍ତି ଯେ, ଯଦି ଓମାନ ଇରାନକୁ ସମର୍ଥନ କରେ, ତେବେ ଆମେରିକା ଏହା ବିରୋଧରେ ଖୁବ୍‌ କଠୋର ଆଭିମୁଖ୍ୟ ଗ୍ରହଣ କରିବ ଓ ଓମାନ ଉପରେ ଆକ୍ରମଣ କରିବ। ଟ୍ରମ୍ପ ଏକ ଗଣମାଧ୍ୟମ ଆଲୋଚନା ସମୟରେ ଏହି ବିବୃତ୍ତି ଦେଇଛନ୍ତି। ହର୍ମୁଜ୍ ପ୍ରଣାଳୀକୁ ପୁନଃ ଖୋଲିବା ପ୍ରସଙ୍ଗରେ ଇରାନର ପକ୍ଷ ନେଲେ ଓମାନ ଉପରେ ଆକ୍ରମଣ କରିବାକୁ ଟ୍ରମ୍ପ ଧମକ ଦେଇଛନ୍ତି। ଟ୍ରମ୍ପ ହର୍ମୁଜ୍ ପ୍ରଣାଳୀ ଉପରେ ଆମେରିକାର ସ୍ଥିତିକୁ ଆହୁରି ସ୍ପଷ୍ଟ କରି କହିଛନ୍ତି, ଆମେ ଏହାକୁ ନିରୀକ୍ଷଣ କରିବୁ, କିନ୍ତୁ କେହି ଏହାକୁ ନିୟନ୍ତ୍ରଣ କରିବେ ନାହିଁ। ଓମାନ ଇରାନ ସହିତ କିଛି ପରିମାଣରେ ସମନ୍ୱୟ ରଖୁଛି ବୋଲି ରିପୋର୍ଟ ପ୍ରକାଶ ପାଇବା ପରେ ଆମେରିକା ରାଷ୍ଟ୍ରପତିଙ୍କ ଏହି ବିବୃତ୍ତି ଆସିଛି। ପାରମ୍ପରିକ ଭାବରେ ଓମାନକୁ ଏହି ଅଞ୍ଚଳରେ ଆମେରିକାର ଏକ ଘନିଷ୍ଠ ସହଯୋଗୀ ଭାବରେ ବିବେଚନା କରାଯାଉଛି, କିନ୍ତୁ ସାମ୍ପ୍ରତିକ ଘଟଣାକ୍ରମ ଏହି ସମ୍ପର୍କକୁ ଖରାପ କରିଛି। ଓମାନକୁ ଅନ୍ୟ ଦେଶ ପରି ଆଚରଣ କରିବାକୁ ପଡିବ, ନଚେତ୍ ଆମକୁ ସେମାନଙ୍କୁ ଉଡ଼ାଇ ଦେବାକୁ ପଡିବ। ଟ୍ରମ୍ପ କହିଲେ,ସେମାନେ ଏହା ବୁଝନ୍ତି, ସେମାନେ ଠିକ୍ ହୋଇଯିବେ। ତଥାପି ଜାହାଜଗୁଡ଼ିକୁ ମୁକ୍ତ ଭାବରେ ଚଳାଚଳ କରିବାକୁ ଅନୁମତି ଦେବା ପାଇଁ ଆମେରିକା କ’ଣ ପଦକ୍ଷେପ ନେବ ତାହା ଟ୍ରମ୍ପ ସ୍ପଷ୍ଟ କରିନାହାନ୍ତି। ଅନ୍ୟପକ୍ଷରେ ଇରାନର ଶାନ୍ତି ପ୍ରସ୍ତାବରେ ଟ୍ରମ୍ପ ସନ୍ତୁଷ୍ଟ ନୁହେଁ। ଶାନ୍ତି ଚୁକ୍ତିର ଉପରେ ଆମେରିକା ଓ ଇରାନ ପ୍ରତିନିଧିମଣ୍ଡଳୀ ମଧ୍ୟରେ ଆଲୋଚନା ଚାଲିଥିବା ବେଳେ ଟ୍ରମ୍ପ କହିଛନ୍ତି ଯେ ସେ ଏପର୍ଯ୍ୟନ୍ତ ଇରାନର ପ୍ରସ୍ତାବଗୁଡ଼ିକ ଉପରେ ସନ୍ତୁଷ୍ଟ ନୁହନ୍ତି। ଏହି ସପ୍ତାହାନ୍ତରେ ଏକ ଚୁକ୍ତି ନିକଟତର ହେବା କଥା କହିବା ସତ୍ତ୍ୱେ, ଟ୍ରମ୍ପ କ୍ୟାବିନେଟ ବୈଠକରେ ସ୍ପଷ୍ଟ କରିଥିଲେ ଯେ ମଧ୍ୟପ୍ରାଚ୍ୟ ଯୁଦ୍ଧ ସମାପ୍ତ କରିବାକୁ ସେ ବ୍ୟସ୍ତ ନୁହନ୍ତି। ସେ ସ୍ପଷ୍ଟ କରିଥିଲେ ଯେ, ଯଦି କୂଟନୀତି ବିଫଳ ହୁଏ ତେବେ ସାମରିକ ବିକଳ୍ପ ଖୋଲା ରହିଛି।