ରାହୁଲ ଗାନ୍ଧୀଙ୍କୁ ଭେଟିଲେ ସିଦ୍ଦରମୈୟା  ଦଳୀୟ ହାଇକମାଣ୍ଡଙ୍କୁ ପ୍ରଦାନ କଲେ ତାଲିକା

ନୂଆଦିଲ୍ଲୀ, ୨୯|୫ : କର୍ଣ୍ଣାଟକ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାର ଦିନକ ପରେ ସିଦ୍ଦରମୈୟା ଶୁକ୍ରବାର ନୂଆଦିଲ୍ଲୀରେ କଂଗ୍ରେସ ନେତା ରାହୁଲ ଗାନ୍ଧୀ ଓ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କୁ ଭେଟି ଦଳୀୟ ହାଇକମାଣ୍ଡଙ୍କୁ ତାଙ୍କର ଦାବିଗୁଡ଼ିକର ତାଲିକା ପ୍ରଦାନ କରିଛନ୍ତି। ସିଦ୍ଦରମୈୟାଙ୍କ ଇଚ୍ଛା ତାଲିକାରେ ଡିକେ ଶିବକୁମାରଙ୍କ ନେତୃତ୍ୱାଧୀନ ନୂତନ କ୍ୟାବିନେଟରେ ତାଙ୍କ ପୁଅ ଯତୀନ୍ଦ୍ରଙ୍କୁ ବଡ଼ ବିଭାଗ ମଧ୍ୟ ସାମିଲ ଅଛି।  ସୂତ୍ର ଅନୁସାରେ ସିଦ୍ଦରମୈୟା ରାଜ୍ୟସଭା ଓ ବିଧାନ ପରିଷଦ ନିଯୁକ୍ତି ପାଇଁ ନାମ ତାଲିକା ପ୍ରଦାନ କରିଥିଲେ ଓ କ୍ୟାବିନେଟ ପଦବୀ ପାଇଁ ତାଙ୍କର ପସନ୍ଦ ମଧ୍ୟ ପ୍ରଦାନ କରିଥିଲେ। ସୂତ୍ର ଅନୁସାରେ ସିଦ୍ଦର‌ମୈୟା ତାଙ୍କ ପୁଅ ଯତୀନ୍ଦ୍ର ସିଦ୍ଦରମୈୟାଙ୍କ ପାଇଁ ମେଡିକାଲ ଶିକ୍ଷା ଓ ପଛୁଆ ବର୍ଗ, କିମ୍ବା ବିକଳ୍ପ ଭାବରେ ଶିଳ୍ପ, ଜଳ ସମ୍ପଦ ବିଭାଗ ଦାବି କରିଛନ୍ତି। ଏହି ସବୁ ବିଭାଗ ତାଙ୍କ କାର୍ଯ୍ୟକାଳରେ ଶିବକୁମାରଙ୍କ ପାଖରେ ରହିଥିଲା।  ଶିବକୁମାରଙ୍କୁ ଦାୟିତ୍ୱ ହସ୍ତାନ୍ତର କରିବା ପରେ ସିଦ୍ଦରମୈୟା ହାଇକମାଣ୍ଡଙ୍କ ଦ୍ୱାରା ପ୍ରଦାନ କରାଯାଇଥିବା ରାଜ୍ୟସଭା ଆସନକୁ ପ୍ରତ୍ୟାଖ୍ୟାନ କରିଛନ୍ତି ଓ କର୍ଣ୍ଣାଟକ ରାଜନୀତିରେ ରହିବାକୁ ତାଙ୍କର ଆଗ୍ରହ ପ୍ରକାଶ କରିଛନ୍ତି ।