ଜୁଲାଇ ୨୦ରେ ମୌସୁମୀ ଅଧିବେଶନ ସୀମା ପୁନଃନିର୍ଦ୍ଧାରଣ ଓ ମହିଳା ସଂରକ୍ଷଣ ବିଲକୁ ଗୁରୁତ୍ବ

ନୂଆଦିଲ୍ଲୀ: ଏଥର ମୌସୁମୀ ଅଧିବେଶନରେ ସୀମା ପୁନଃନିର୍ଦ୍ଧାରଣ ଓ ମହିଳା ସଂରକ୍ଷଣ ବିଲ୍ ଉପରେ ବିଶେଷ ଗୁରୁତ୍ବ ରହିବ। ଏ ନେଇ ସଂସଦର ଆଗାମୀ ମୌସୁମୀ ଅଧିବେଶନ ଉପରେ ସମସ୍ତଙ୍କ ନଜର ରହିଛି। ଜୁଲାଇ ୨୦ରୁ ଅଗଷ୍ଟ ୧୩ ପର୍ଯ୍ୟନ୍ତ ଚାଲିବାକୁ ଥିବା ଏହି ଅଧିବେଶନରେ ପରିସୀମନ (ସୀମା ପୁନଃନିର୍ଦ୍ଧାରଣ) ଓ ମହିଳା ସଂରକ୍ଷଣ ସମ୍ବନ୍ଧୀୟ ଗୁରୁତ୍ବପୂର୍ଣ୍ଣ ବିଲ୍ ଉପରେ ଆଲୋଚନା ହେବାର ସମ୍ଭାବନା ରହିଛି। ଇତି ମଧ୍ୟରେ ବିଜେପି ତାର ସଂଖ୍ୟା ଗରିଷ୍ଠତା ହାସଲ କରିଛି ବୋଲି ଚର୍ଚ୍ଚା ହେଉଛି। ଜନସଂଖ୍ୟା ଆଧାରରେ ଆସନ ବଣ୍ଟନ ହେଲେ ରାଜନୈତିକ ସମତାରେ ପ୍ରଭାବ ପଡ଼ିପାରେ ବୋଲି ବିରୋଧୀ ଦଳମାନେ ମତ ପ୍ରକାଶ କରୁଛନ୍ତି। ଅନ୍ୟପଟେ ସରକାର ଏହାକୁ ନ୍ୟାୟସଙ୍ଗତ ପ୍ରତିନିଧିତ୍ୱ ଦେବାର ଏକ ଆବଶ୍ୟକ ପ୍ରକ୍ରିୟା ବୋଲି ଦାବି କରୁଛନ୍ତି। ମହିଳା ସଂରକ୍ଷଣ ବିଲ୍ ମଧ୍ୟ ଏହି ଅଧିବେଶନର ମୁଖ୍ୟ ଆକର୍ଷଣ ହେବ। ଲୋକସଭା ଓ ରାଜ୍ୟ ବିଧାନସଭାରେ ମହିଳାଙ୍କ ପାଇଁ ଅଧିକ ସଂରକ୍ଷଣ ଦେବା ପ୍ରସ୍ତାବ ଉପରେ ଦୀର୍ଘଦିନ ଧରି ଚର୍ଚ୍ଚା ଚାଲିଆସୁଛି। ଏହି ବିଲ୍ ପାସ୍ ହେଲେ ଭାରତର ରାଜନୀତିରେ ମହିଳାଙ୍କ ଭୂମିକା ଆହୁରି ବୃଦ୍ଧି ପାଇବ ବୋଲି ଆଶା କରାଯାଉଛି।ଏହା ସହିତ ଅର୍ଥନୀତି, ନିଯୁକ୍ତି, ଦରଦାମ୍ ବୃଦ୍ଧି, ରାଷ୍ଟ୍ରୀୟ ସୁରକ୍ଷା ଓ ବିଦେଶ ନୀତି ସମ୍ପର୍କିତ ଅନେକ ପ୍ରଶ୍ନ ମଧ୍ୟ ସଂସଦରେ ଉଠିପାରେ। ବିରୋଧୀ ଦଳମାନେ ସରକାରଙ୍କୁ ଏହି ବିଷୟଗୁଡ଼ିକରେ ଘେରିବା ପାଇଁ ପ୍ରସ୍ତୁତି କରିଛନ୍ତି। ସଂସଦୀୟ କାର୍ଯ୍ୟ ସୁଚାରୁ ରୂପେ ଚାଲିବା ପାଇଁ ସରକାରଙ୍କ ପକ୍ଷରୁ ସମସ୍ତ ଦଳ ସହ ଆଲୋଚନା କରାଯାଉଛି।