ଟ୍ରମ୍ପଙ୍କୁ ଶକ୍ତ ଝଟ୍କା, ଆମେରିକା ସଂସଦରେ ପାସ୍ ହେଲା ରାଷ୍ଟ୍ରପତିଙ୍କ ବିରୋଧୀ ପ୍ରସ୍ତାବ !
ନୂଆଦିଲ୍ଲୀ, : ଆମେରିକା ରାଜନୀତିରେ ବଡ଼ ଧରଣର ହଡ଼କମ୍ପ ଦେଖିବାକୁ ମିଳିଛି। ସ୍ପିକରଙ୍କ ବିରୋଧ ସତ୍ତ୍ୱେ ଆମେରିକା ସଂସଦରେ ରାଷ୍ଟ୍ରପତିଙ୍କ ବିରୋଧୀ ପ୍ରସ୍ତାବ ପାସ ହୋଇଥିବା ଜଣାପଡ଼ିଛି। ଡେମୋକ୍ରାଟ୍ସଙ୍କ ସହ ୪ ରିପବ୍ଲିକାନ୍ ସାଂସଦ ହାତ ମିଳାଇଥିବା ଦେଖିବାକୁ ମିଳିଥିଲା। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଇରାନ ଯୁଦ୍ଧ ମାମଲାରେ ସବୁଠାରୁ ବଡ଼ ରାଜନୈତିକ ଧକ୍କା ଲାଗିଛି । ରାଷ୍ଟ୍ରପତି ଟ୍ରମ୍ପ ଯେଉଁ ଆଶଙ୍କା କରୁଥିଲେ, ଶେଷରେ ତାହା ହିଁ ଘଟିଛି । ଆମେରିକା ସଂସଦର ତଳ ସଦନ ‘ହାଉସ୍ ଅଫ୍ ରିପ୍ରେଜେଣ୍ଟେଟିଭ୍ସ’ ରେ ରାଷ୍ଟ୍ରପତିଙ୍କ ସମର ଶକ୍ତିକୁ ସୀମିତ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ପ୍ରସ୍ତାବ ପାସ୍ ହୋଇଯାଇଛି । ସଦନର ସ୍ପିକର ମାଇକ୍ ଜନସନ୍ ଏହି ପ୍ରସ୍ତାବକୁ ଅଟକାଇବା ପାଇଁ ଅନେକ ଚେଷ୍ଟା କରିଥିଲେ ସୁଦ୍ଧା ସେ ବିଫଳ ହୋଇଛନ୍ତି ଏବଂ ବିରୋଧୀ ଡେମୋକ୍ରାଟ୍ସଙ୍କ ସହ କିଛି ଶାସକ ରିପବ୍ଲିକାନ୍ ସାଂସଦ ହାତ ମିଳାଇବାରୁ ଏହି ପ୍ରସ୍ତାବ ଗୃହୀତ ହୋଇଛି। ଇରାନ ସହିତ ଚାଲିଥିବା ସଂଘର୍ଷକୁ ନେଇ ରାଷ୍ଟ୍ରପତି ଟ୍ରମ୍ପ ଆପଣାଇଥିବା ରଣନୀତି ଉପରେ ଏବେ ନିଜ ଦଳର ନେତାମାନେ ହିଁ ପ୍ରଶ୍ନ ଉଠାଇବା ଆରମ୍ଭ କଲେଣି । ମଧ୍ୟପ୍ରାଚ୍ୟରେ ଆଉ ଏକ ଅନିଶ୍ଚିତକାଳୀନ ଯୁଦ୍ଧରେ ଆମେରିକା ସାମିଲ ହେଉ, ଏହା ନିଜେ ରିପବ୍ଲିକାନ୍ ପାର୍ଟିର ଅନେକ ସାଂସଦ ଏବଂ ସେମାନଙ୍କର ଭୋଟର ଚାହୁଁନାହାନ୍ତି । ଫଳରେ ବିଲ୍ ସପକ୍ଷରେ ଭୋଟ୍ ଦେଇ ୪ ଜଣ ପ୍ରଭାବଶାଳୀ ରିପବ୍ଲିକାନ୍ ସାଂସଦ (ଥୋମାସ୍ ମାସି, ବ୍ରାଏନ୍ ଫିଜ୍ପାଟ୍ରିକ, ୱାରେନ୍ ଡେଭିଡସନ୍ ଏବଂ ଟମ୍ ବାରେଟ୍) ଟ୍ରମ୍ପଙ୍କୁ ବଡ଼ ଝଟ୍କା ଦେଇଛନ୍ତି । ଏହି ସମର ଶକ୍ତି ପ୍ରସ୍ତାବ ଉପରେ ହୋଇଥିବା ଭୋଟିଂ ବେଶ୍ ରୋମାଞ୍ଚକର ଥିଲା । ପ୍ରସ୍ତାବ ସପକ୍ଷରେ ୨୧୫ ଟି ଭୋଟ୍ ପଡ଼ିଥିବା ବେଳେ ବିରୋଧରେ ୨୦୮ ଟି ଭୋଟ୍ ପଡ଼ିଥିଲା । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ବିରୋଧୀ ଡେମୋକ୍ରାଟ୍ ଦଳର କୌଣସି ବି ସାଂସଦ ଏହି ବିଲ୍ ବିରୋଧରେ ଭୋଟ୍ ଦେଇନାହାନ୍ତି, ଯାହା ସେମାନଙ୍କର ଏକତାକୁ ଦର୍ଶାଉଛି । ଆମେରିକା ସମ୍ବିଧାନ ଅନୁଯାୟୀ କେବଳ ସଂସଦ ପାଖରେ ହିଁ ଯୁଦ୍ଧ ଘୋଷଣା କରିବାର ଅଧିକାର ରହିଛି । ଏହି ଭୋଟିଂ ଜରିଆରେ ସଂସଦ ରାଷ୍ଟ୍ରପତିଙ୍କୁ ଏକ ସ୍ପଷ୍ଟ ବାର୍ତ୍ତା ଦେଇଛି ଯେ, ସେ ସଂସଦର ଅନୁମତି ବିନା ମନମୁଖୀ ଭାବେ ସେନା ବ୍ୟବହାର କରିପାରିବେ ନାହିଁ ।
ସଂସଦର ତଳ ସଦନରେ ପ୍ରସ୍ତାବ ପାସ୍ ହୋଇଥିଲେ ମଧ୍ୟ ଏହାର ଆଗାମୀ ରାସ୍ତା ସହଜ ନୁହେଁ । ଯେକୌଣସି ବିଲ୍ ଆଇନରେ ପରିଣତ ହେବା ପାଇଁ ଏହା ଉଭୟ ସଦନ (ହାଉସ୍ ଏବଂ ସିନେଟରୁ ପାସ୍ ହେବା ଜରୁରୀ । ଯଦିଓ ଏହା ସିନେଟରୁ ମଧ୍ୟ ପାସ୍ ହୋଇଯାଏ, ତଥାପି ହ୍ୱାଇଟ୍ ହାଉସ୍ରେ ଏହାକୁ ରାଷ୍ଟ୍ରପତିଙ୍କ ‘ଭିଟୋ ପାୱାର’ର ସର୍ବୋଚ୍ଚ ଶକ୍ତିର ସାମ୍ନା କରିବାକୁ ପଡ଼ିବ । ଆଶଙ୍କା କରାଯାଉଛି ଯେ ରାଷ୍ଟ୍ରପତି ଟ୍ରମ୍ପ ଏହି ପ୍ରସ୍ତାବକୁ ନିଜର ଭିଟୋ କ୍ଷମତା ବଳରେ ରଦ୍ଦ କରିଦେବେ । କିନ୍ତୁ ଏହା ସତ୍ତ୍ୱେ, ସଂସଦରେ ଏହି ପ୍ରସ୍ତାବ ପାସ୍ ହେବା ନିଜେ ଟ୍ରମ୍ପଙ୍କ ଯୁଦ୍ଧ ନୀତି ବିରୋଧରେ ଏକ ବଡ଼ ପ୍ରତିବାଦ ଏବଂ ରାଜନୈତିକ ପରାଜୟ ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି ।
