ରାମେଶ୍ୱର-ପାରାଦୀପ ପ୍ରକଳ୍ପକୁ ମଞ୍ଜୁରୀ ୮,୩୦୦.୭୯ କୋଟି ଟଙ୍କା ବ୍ୟୟ ଅଟକଳ
ନୂଆଦିଲ୍ଲୀ, ୩|୬: ଓଡ଼ିଶା ଉପକୂଳ ରାଜପଥ ପ୍ରକଳ୍ପକୁ କେନ୍ଦ୍ର ସରକାରଙ୍କ ମୋହର। ଏଥିପାଇଁ ୮,୩୦୦.୭୯ କୋଟି ଟଙ୍କା ବ୍ୟୟ ଅଟକଳ ନେଇ ମଞ୍ଜୁରୀ ପ୍ରଦାନ କରାଯାଇଛି। ଏହି ରାଜପଥ ରାମେଶ୍ୱରରୁ ପାରାଦୀପ ପର୍ଯ୍ୟନ୍ତ ନିର୍ମାଣ ହେବ। ମୋଟ ୧୬୦.୧୮ କିଲୋମିଟର ବିଶିଷ୍ଟ ରାସ୍ତା ଦୁଇଟି ପ୍ୟାକେଜରେ ନିର୍ମାଣ ହେବ। ରାମେଶ୍ୱରରୁ କୋଣାର୍କ ପର୍ଯ୍ୟନ୍ତ ୭୯.୪ କିଲୋମିଟର ୪-ଲେନ୍ ବିଶିଷ୍ଟ ରାସ୍ତା ହେବ। କୋଣାର୍କରୁ ପାରାଦୀପ ପର୍ଯ୍ୟନ୍ତ ୮୦.୭୮ କିଲୋମିଟର ୨-ଲେନ୍ ବିଶିଷ୍ଟ ରାସ୍ତା କରାହେବ। ଏହା ଖୋର୍ଦ୍ଧା, ପୁରୀ, କେନ୍ଦ୍ରାପଡ଼ା ଏବଂ ଜଗତସିଂହପୁର ଜିଲ୍ଲା ଦେଇ ଯିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଆର୍ଥିକ ବ୍ୟାପାର କ୍ୟାବିନେଟ୍ କମିଟି ଆଜି ଓଡ଼ିଶାରେ ହାଇବ୍ରିଡ୍ ଆନୁଇଟି ମଡେଲ୍ (ଏଚଏଏମ) ଉପରେ ରାମେଶ୍ୱରରୁ ପାରାଦୀପ ପର୍ଯ୍ୟନ୍ତ ନୂତନ ଉପକୂଳ ରାଜପଥ ନିର୍ମାଣକୁ ଅନୁମୋଦନ କରିଛି ଯାହାର ମୋଟ ଲମ୍ବ ୧୬୦.୧୮ କିଲୋମିଟର ଏବଂ ମୋଟ ପୁଞ୍ଜି ମୂଲ୍ୟ ୮୩୦୦.୭୯ କୋଟି ଟଙ୍କା ରହିଛି। ଜାତୀୟ ରାଜପଥ-୩୧୬ ଭୁବନେଶ୍ୱର-ପୁରୀକୁ ସଂଯୋଗ କରେ ଏବଂ ଆହୁରି ସାତପଡ଼ା ଏବଂ କୋଣାର୍କ ଆଡକୁ ବିସ୍ତୃତ ହୁଏ। ଅନ୍ୟପଟେ ଏହାଦ୍ବାରା ରାଜ୍ୟର ଖୋର୍ଦ୍ଧା, ପୁରୀ, କେନ୍ଦ୍ରାପଡା ଏବଂ ଜଗତସିଂହପୁର ଜିଲ୍ଲା ମଧ୍ୟରେ ଘଣ୍ଟା ପ୍ରତି ୧୦୦ କିଲୋମିଟର ବେଗ ନେଇ ଡିଜାଇନ୍ ପ୍ରସ୍ତୁତ ହେବା ସହ ଏବଂ ଉନ୍ନତ ଯାତ୍ରା ଦକ୍ଷତା ସୁନିଶ୍ଚିତ ହେବ। ଏହି ପ୍ରକଳ୍ପ ଆଞ୍ଚଳିକ ଗତିଶୀଳତାକୁ ମଧ୍ୟ ବୃଦ୍ଧି କରିବ ଏବଂ ସାମାଜିକ-ଆର୍ଥିକ ବିକାଶକୁ ପ୍ରୋତ୍ସାହିତ କରିବ। ପ୍ରକଳ୍ପଗୁଡ଼ିକ ପ୍ରଧାନମନ୍ତ୍ରୀ ଗତିଶକ୍ତି ନୀତି ସହିତ ସଙ୍ଗତ ଏବଂ ୯ଟି ଅର୍ଥନୈତିକ ନୋଡ୍ ଏବଂ ୫ଟି ଲଜିଷ୍ଟିକ୍ ନୋଡ୍ ସଂଯୋଗ କରିବ। ଏହା ଦେଶର ଲଜିଷ୍ଟିକ୍ ପ୍ରଦର୍ଶନ ସୂଚକାଙ୍କ ଉପରେ ସକାରାତ୍ମକ ପ୍ରଭାବ ପକାଇବ। ସମ୍ପୂର୍ଣ୍ଣ ହେବା ପରେ, ରାମେଶ୍ୱର ଏବଂ ପାରାଦୀପ ମଧ୍ୟରେ ଯାତ୍ରା ସମୟ ପ୍ରାୟ ୨ ଘଣ୍ଟା ୩୦ ମିନିଟ୍ ହ୍ରାସ ପାଇବ ବୋଲି ଆଶା କରାଯାଉଛି, ଏହା ସହିତ ଯାତ୍ରୀ ଏବଂ ମାଲ ପରିବହନ ପାଇଁ ନିରାପଦ, ଦ୍ରୁତ ଏବଂ ନିରବଚ୍ଛିନ୍ନ ସଂଯୋଗୀକରଣ ପ୍ରଦାନ କରିବ। ଏହା ସହିତ, ଏହି ପ୍ରକଳ୍ପ ଇନ୍ଧନ ବ୍ୟବହାର, କାର୍ବନ ନିର୍ଗମନ ଏବଂ ଯାନବାହାନ ପରିଚାଳନା ଖର୍ଚ୍ଚରେ ଯଥେଷ୍ଟ ହ୍ରାସ ଆଣିବ।
