ଚୀନ୍ର କୋଇଲା ଖଣିରେ ଭୟଙ୍କର ବିସ୍ଫୋରଣ, ୯୦ ମୃତ
ବେଜିଂ, ୨୩|୫: ଚୀନ୍ର ଏକ କୋଇଲା ଖଣିରେ ଭୟଙ୍କର ବିସ୍ଫୋରଣ ହୋଇଥିବାବେଳେ ଏଥିରେ ୯୦ ଜଣଙ୍କ ମୃତ୍ୟୁ ହୋଇଥିବା ଖବର ମିଳିଛି। ଉତ୍ତର ଚୀନର ଶାଂସି ପ୍ରଦେଶର ଟୋଙ୍ଗଝୋ ଗ୍ରୁପ୍ ଦ୍ୱାରା ପରିଚାଳିତ ଲିଉସେନ୍ୟୁ କୋଇଲା ଖଣିରେ ଏହି ଗ୍ୟାସ ବିସ୍ଫୋରଣ ଘଟିଥିଲା।ଏବେ ବି ଖଣିରେ ଏକାଧିକ ଶ୍ରମିକ ଫସି ରହିଛନ୍ତି ବୋଲି କୁହାଯାଉଛି। ରାଷ୍ଟ୍ରପତି ସି ଜିନପିଙ୍ଗ ଘଟଣାସ୍ଥଳରେ ଶୀଘ୍ର ଉଦ୍ଧାର କାର୍ଯ୍ୟ ପାଇଁ ନିର୍ଦ୍ଦେଶ ଦେଇଛନ୍ତି। ସେ ଦୁର୍ଘଟଣାର କାରଣ ତଦନ୍ତ ଏବଂ ଦୋଷୀମାନଙ୍କୁ ଉପରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରତିଶ୍ରୁତି ଦେଇଛନ୍ତି। ଚୀନ୍ର ସରକାରୀ ଖବର ସଂସ୍ଥା ଜିନହୁଆ ଅନୁଯାୟୀ, ଶୁକ୍ରବାର ସନ୍ଧ୍ୟାରେ ଚାଙ୍ଗଝି ସହରର ଲିଉସେନ୍ୟୁ କୋଇଲା ଖଣିରେ ଏହି ଦୁର୍ଘଟଣା ଘଟିଛି। ଏହି ଦୁର୍ଘଟଣା ସମୟରେ ଖଣିରେ ପ୍ରାୟ ୨୪୭ ଜଣ ଶ୍ରମିକ କାମ କରୁଥିଲେ। ଶନିବାର ସକାଳ ସୁଦ୍ଧା ୨୦୧ ଜଣ ଶ୍ରମିକଙ୍କୁ ଉଦ୍ଧାର କରାଯାଇଛି। ୧୦୦ ରୁ ଅଧିକ ଲୋକଙ୍କୁ ଡାକ୍ତରଖାନା ନିଆଯାଇଥିବାବେଳେ ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି। ଅନ୍ୟପଟେ ବିସ୍ଫୋରଣ କିପରି ଘଟିଲା ତାହାର ତଦନ୍ତ ଜାରି ରହିଛି। ଶାଂସି ପ୍ରଦେଶକୁ ଚୀନ୍ର ମୁଖ୍ୟ କୋଇଲା ଉତ୍ପାଦନକାରୀ ପ୍ରଦେଶ ଭାବରେ ବିବେଚନା କରାଯାଏ। ୟୁନାନଠାରୁ ବଡ଼ ଏହି ପ୍ରଦେଶର ଜନସଂଖ୍ୟା ପ୍ରାୟ ୩ କୋଟି ୪୦ ଲକ୍ଷ। ଗତ ବର୍ଷ ଖଣିରୁ ୧.୩ ବିଲିୟନ ଟନ୍ କୋଇଲା ଖନନ କରାଯାଇଥିଲା। ଯାହା ଚୀନ୍ର ମୋଟ କୋଇଲା ଉତ୍ପାଦନର ପ୍ରାୟ ଏକ ତୃତୀୟାଂଶ ଥିଲା।
