ଆମେରିକାର ଡ୍ରୋନ ଖସାଇଲା ଇରାନ!
ତେହେରାନ: ଦିନକୁ ଦିନ ଭୟାବହ ରୂପ ନେଉଛି ଇରାନ-ଆମେରିକା ଯୁଦ୍ଧ ପରିସ୍ଥିତି। ଧୀରେ ଧୀରେ ମଧ୍ୟପ୍ରାଚ୍ୟରେ ଉତ୍ତେଜନା ବଢ଼ିବାରେ ଲାଗିଛି। ଆଇଆର୍ଜିସି ଇରାନ ବାୟୁମଣ୍ଡଳରେ ଏକ ଆମେରିକୀୟ ଏମ୍କ୍ୟୁ-୧ ଡ୍ରୋନକୁ ଗୁଳି କରି ଖସାଇ ଦେଇଥିବା ଦାବି କରିଛି। ଇରାନର ଅର୍ଦ୍ଧ-ସରକାରୀ ସମାଚାର ଏଜେନ୍ସି ଅନୁଯାୟୀ, ଇରାନ ବାୟୁମଣ୍ଡଳରେ ପ୍ରବେଶ କରିବାର କିଛି ସମୟ ପରେ ନିରୀକ୍ଷଣ ଏବଂ ବାୟୁ ପ୍ରତିରକ୍ଷା ପ୍ରଣାଳୀ ଦ୍ୱାରା ଡ୍ରୋନ୍କୁ ଚିହ୍ନଟ କରାଯାଇ ଖସାଇ ଦିଆଯାଇଥିଲା। ଇରାନୀ ଅଧିକାରୀମାନେ ଦାବି କରିଛନ୍ତି ଯେ,ଡ୍ରୋନ୍କୁ ସଫଳତାର ସହ ନଷ୍ଟ କରାଯାଇଛି। ଆଇଆର୍ଜିସି ଡ୍ରୋନ୍ ଆମେରିକୀୟ ସେନାର ବୋଲି ଚିହ୍ନଟ କରିଛି। ଡ୍ରୋନ୍ ଆକ୍ରମଣ କରିବା ଉଦ୍ଦେଶ୍ୟରେ ପ୍ରବେଶ କରୁଥିଲା। ତେବେ ଆମେରିକା ପକ୍ଷରୁ ଏନେଇ କୌଣସି ମନ୍ତବ୍ୟ ପ୍ରଦାନ କରାଯାଇନାହିଁ। ମଧ୍ୟପ୍ରାଚ୍ୟରେ ଚାଲିଥିବା ଉତ୍ତେଜନା ମଧ୍ୟରେ, ଆମେରିକାର ଡ୍ରୋନ୍କୁ ଖସାଇଦେବାକୁ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପାଇଁ ଏକ ବଡ଼ ଝଟକା ବୋଲି ବିବେଚନା କରାଯାଉଛି। ଆମେରିକା ଏବଂ ଇରାନ ମଧ୍ୟରେ ଅସ୍ତ୍ରବିରତି ନେଇ ଆଲୋଚନା ଚାଲିଥିବା ବେଳେ, ଇରାନ ଆମେରିକୀୟ ଡ୍ରୋନ୍କୁ ଖସାଇ ଦେଇଛି। ଏହା ବ୍ୟତୀତ, ହର୍ମୁଜ୍ ପ୍ରଣାଳୀ ସମ୍ପର୍କରେ ଆମେରିକାର ଦାବି ଏବେ ଭିତ୍ତିହୀନ ମନେ ହେଉଛି। ଇରାନ ସ୍ପଷ୍ଟ ଭାବରେ କହିଛି ଯେ ହର୍ମୁଜ୍ ପ୍ରଣାଳୀର ପରିଚାଳନା ସମ୍ପୂର୍ଣ୍ଣ ଭାବରେ ଇରାନର ଅଧିକାର କ୍ଷେତ୍ର ମଧ୍ୟରେ ରହିଛି।
