ଇସ୍ତଫା ଖବରକୁ ଇରାନ ରାଷ୍ଟ୍ରପତିଙ୍କ ଅସ୍ୱୀକାର

ତେହେରାନ: ଇରାନରେ ରାଷ୍ଟ୍ରପତି ମାସୁଦ ପେଜେସ୍କିଆନଙ୍କ ଇସ୍ତଫା ଖବର ରାଜନୈତିକ ମହଲରେ ଆଲୋଡ଼ନ ସୃଷ୍ଟି କରିଥିଲା। କିନ୍ତୁ ଏବେ ରାଷ୍ଟ୍ରପତି ନିଜେ ନୀରବତା ଭଙ୍ଗ କରି ସମସ୍ତ କଳ୍ପନାଜଳ୍ପନାର ଅନ୍ତ ଘଟାଇଛନ୍ତି। ଅଲ୍ ଆରବିଆ ରିପୋର୍ଟ ଅନୁଯାୟୀ, ପେଜେସ୍କିଆନ ସ୍ପଷ୍ଟ ଭାବରେ କହିଛନ୍ତି ଯେ, ସେ ତାଙ୍କ ପଦବୀ ଛାଡୁନାହାଁନ୍ତି ଏବଂ ତାଙ୍କର ଦାୟିତ୍ୱ ନିର୍ବାହ କରୁଛନ୍ତି। ସେ କହିଛନ୍ତି, ମୁଁ ମୋର କାମ ଜାରି ରଖିବି ଏବଂ ଯେକୌଣସି ପରିସ୍ଥିତି ପାଇଁ ପ୍ରସ୍ତୁତ। ତାଙ୍କର ଏହି ମନ୍ତବ୍ୟ ଏପରି ସମୟରେ ଆସିଛି ଯେତେବେଳେ ଇରାନର ରାଜନୈତିକ ଏବଂ ଅର୍ଥନୈତିକ ପରିସ୍ଥିତି ସମ୍ପର୍କରେ ଅନେକ ଆଲୋଚନା ଚାଲିଛି। ରବିବାର ଅନେକ ରିପୋର୍ଟରେ ଦାବି କରାଯାଇଥିଲା ଯେ, ରାଷ୍ଟ୍ରପତି ତାଙ୍କ ପଦବୀରୁ ଇସ୍ତଫା ଦେବାକୁ ପ୍ରସ୍ତାବ ଦେଇଛନ୍ତି। ସେ ସର୍ବୋଚ୍ଚ ନେତା ମୋଜତାବା ଖାମେନିଙ୍କୁ ତାଙ୍କ ଇସ୍ତଫାପତ୍ର ପ୍ରଦାନ କରିଛନ୍ତି। ପେଜେସ୍କିଆନ କହିଛନ୍ତି ଯେ, ତାଙ୍କ ସରକାର ସମସ୍ୟାଗୁଡ଼ିକୁ ଲୁଚାଇବା ପରିବର୍ତ୍ତେ ଜନସାଧାରଣଙ୍କ ସମ୍ମୁଖରେ ଉପସ୍ଥାପନ କରୁଛି। ରାଷ୍ଟ୍ରପତି ଗୁରୁତ୍ୱାରୋପ କରିଛନ୍ତି ଯେ, ମିଳିତ ଭାବରେ ଚ୍ୟାଲେଞ୍ଜଗୁଡ଼ିକର ମୁକାବିଲା କରିବା ପାଇଁ ବର୍ତ୍ତମାନର ସଙ୍କଟର ଗମ୍ଭୀରତା ବିଷୟରେ ଜନସାଧାରଣଙ୍କ ସହ ସ୍ୱଚ୍ଛତା ଜରୁରୀ।