ପାକିସ୍ତାନରେ ରେଲୱେ ଟ୍ରାକ୍ରେରେ ବିସ୍ଫୋରଣ: ୨୩ ମୃତ, ୪୭ ଆହତ
ନୂଆଦିଲ୍ଲୀ,୨୪|୫: ପାକିସ୍ତାନର କ୍ୱେଟାରେ ଏକ ରେଳଲାଇନ ବଡ଼ ଧରଣର ବିସ୍ଫୋରଣ ହୋଇଛି। ଫଳରେ ୨୩ ଜଣଙ୍କ ମୃତ୍ୟୁ ହୋଇଥିବା ବେଳେ ୪୭ ଜଣ ଆହତ ହୋଇଛନ୍ତି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଆତଙ୍କ ସୃଷ୍ଟି ହୋଇଛି। ସେପଟେ ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ରିପୋର୍ଟ ଅନୁସାରେ, ଟ୍ରେନ୍ ଟି କ୍ୱେଟା କ୍ୟାଣ୍ଟନମେଣ୍ଟ ଅଞ୍ଚଳ ଆଡକୁ ଯାଉଥିବା ସମୟରେ ରେଳ ଲାଇନରେ ବିସ୍ଫୋରଣ ହୋଇଥିଲା। ବିସ୍ଫୋରଣ ପରେ, ଅଞ୍ଚଳରେ ଗୁଳି ଫୁଟିବା ଶବ୍ଦ ଶୁଣି ଲୋକେ ଭୟଭୀତ ହୋଇଯାଇଥିଲେ। ବେଲୁଚିସ୍ତାନ ସରକାରୀ ଅଧିକାରୀ ବାବର ୟୁସୁଫଜାଇ କହିଛନ୍ତି ଯେ, ପୋଲିସ, ସୁରକ୍ଷା ବାହିନୀ ଏବଂ ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳରେ ପହଞ୍ଚିଛନ୍ତି। ପୋଲିସ ବର୍ତ୍ତମାନ ବିସ୍ଫୋରଣର କାରଣ ତଦନ୍ତ କରୁଛି। ଏପର୍ଯ୍ୟନ୍ତ କୌଣସି ସଂଗଠନ ଏହି ଆକ୍ରମଣ ପାଇଁ ଦାୟୀ କରିନାହିଁ। ବେଲୁଚିସ୍ତାନ ହେଉଛି ପାକିସ୍ତାନର ଏକ ପ୍ରମୁଖ ଅଞ୍ଚଳ ଯାହା ଦୀର୍ଘ ସମୟ ଧରି ହିଂସା ଏବଂ ବିଚ୍ଛିନ୍ନତାବାଦୀ କାର୍ଯ୍ୟକଳାପ ସୃଷ୍ଟି କରୁଥିବାରୁ ସନ୍ଦେହ କରାଯାଉଛି। ଅନ୍ୟପଟେ ରେଳବାଇ ଅଧିକାରୀମାନେ କହିଛନ୍ତି ଯେ, ଚମନ ଗେଟ୍ ନିକଟରେ କ୍ୱେଟା କ୍ୟାଣ୍ଟରୁ ଆସୁଥିବା ଏକ ସଟଲ୍ ଟ୍ରେନ୍କୁ ଟାର୍ଗେଟ କରାଯାଇଥିଲା। ବିସ୍ଫୋରଣରେ ଇଞ୍ଜିନ୍ ସମେତ ତିନୋଟି କୋଚ ଲାଇନଚ୍ୟୁତ ହୋଇଥିଲା ଏବଂ ଦୁଇଟି ଓଲଟି ପଡ଼ିଥିଲା। ପାର୍କିଂ ସ୍ଥାନରେ ଠିଆ ହୋଇଥିବା ଦଶଟି ଗାଡ଼ି ମଧ୍ୟ କ୍ଷତିଗ୍ରସ୍ତ ହୋଇଛି। ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ନିକଟସ୍ଥ କୋଠାଗୁଡ଼ିକର କାଚ ଏବଂ ଝରକା ଭାଙ୍ଗି ଯାଇଥିଲା। ସମଗ୍ର ଅଞ୍ଚଳକୁ ଘେରାବନ୍ଦୀ କରାଯାଇଛି ଏବଂ ଉଦ୍ଧାର କାର୍ଯ୍ୟ ଜାରି ରହିଛି। ଘଟଣା ପରେ, ସତର୍କତାମୂଳକ ପଦକ୍ଷେପ ସ୍ୱରୂପ ପେଶାୱର ଯାଉଥିବା ଜାଫର ଏକ୍ସପ୍ରେସ୍କୁ କ୍ୱେଟା ରେଳ ଷ୍ଟେସନ୍ରେ ଅଟକାଯାଇଥିଲା। ପାକିସ୍ତାନର ରେଳମନ୍ତ୍ରୀ ମହମ୍ମଦ ହନିଫ ଆବାସି ଏହି ଆକ୍ରମଣକୁ କଡ଼ା ନିନ୍ଦା କରିଛନ୍ତି। ସେ ଏହାକୁ ଏକ କାପୁରୁଷ ଆତଙ୍କବାଦୀ ଆକ୍ରମଣ ବୋଲି କହିଛନ୍ତି ଏବଂ କହିଛନ୍ତି ଯେ ଏପରି ଆକ୍ରମଣ ପାକିସ୍ତାନର ଆତଙ୍କବାଦ ବିରୋଧରେ ଦୃଢ଼ ସଂକଳ୍ପକୁ ଦୁର୍ବଳ କରିପାରିବ ନାହିଁ। ଆବାସି କହିଛନ୍ତି ଯେ ଫସି ରହିଥିବା ଯାତ୍ରୀମାନଙ୍କୁ ଉଦ୍ଧାର କରିବା ପାଇଁ ଘଟଣାସ୍ଥଳକୁ ଉଦ୍ଧାର ଟ୍ରକ୍ ଏବଂ ଏକ ରିଲିଫ୍ ଟ୍ରେନ୍ ପଠାଯାଇଛି। ରେଳମନ୍ତ୍ରୀ ଘଟଣା ସମ୍ପର୍କରେ ଅଧିକାରୀଙ୍କଠାରୁ ରିପୋର୍ଟ ମାଗିଛନ୍ତି।
